Alles op de Vëlo Mamer Miersch

Déi 24. Editioun vum Vëlosdag hat vill Succès. Ganz vill Leit ware mat hirem Vëlo de Sonndeg, den 14. Juli 2019 op der Streck ënnerwee.

Ganz sympathesch, datt déi Veräiner bereet waren, hiert Schlassfest eng Woch méi spéit ofzehalen, an de Vëlosdag um 14. Juli méiglech gemaach hunn.

Mam Vëlosdag sollt och drop higewise ginn, datt d’Streck tëschent Miersch a Mamer net just eng geféierlech Rennstreck fir Autoen ass, mee duerch eng ganz flott Landschaft am Mamerdall féiert. Et soll och Drock gemaach ginn, fir eng Vëlosstreck duerch dee flotten Mamerdall ze realiséieren.

D’Vëlospiste ass elo ugefaangen. Den Deel tëscht Miersch a Schëndels gëtt gebaut, och wann nach net kloer ass, op de Wee däerf an de Schlasspark erageluecht ginn. Et gëtt och dru geschafft, fir de Wee weider iwwer Koplescht op Mamer ze féieren. Hei geet et duerch een Natura 2000 Gebitt, esou datt d’Planung laang an komplizéiert dierft ginn.

Op et nach eng Veranstaltung wéi “Alles op de Vëlo Mamer-Miersch » gëtt, wann de Vëloswee bis fäerdeg ass ? Dat steet an de Stären. Sécher ass awer, datt d’nächst Joer déi 25. Editioun wäert organiséiert ginn.  

Werbeanzeigen

Place to bees

Mëttwoch, den 10. Juli 2019 ass d’Beienhaus vun der Mierscher Schoul (Cecile Ries) ageweit ginn.

E super flotte Projet!

Fein, datt e Schoulmeeschter, den Serge Braun, ee Beiemann ass an de Projet encadréiert. Super, datt den zoustännegen Fieschter, den Guy Gilson, sech fir d’Realisatioun vum Projet agesat huet.

D’Mierscher Gemeng huet de Projet natierlech och ënnerstëtzt.

Interessant, datt de Projet am direkten Zesummenhang vum Bau vun der Nordstrooss steet: De ganze Plateau vun der « tranchée couverte » gëtt vun der Gemeng Miersch geréiert. Esou ass mat der Zäit e Vëloswee, eng Liigewiss vun der Piscine, e Verkéiersgaart, en Uebstbongert a schlussendlech een Beienhaus entstan.

D’Schoulkanner kënnen am Kader vum Mierscher Fuerscherhaus net nëmmen d’Beien kenne léieren an beobachten, mee och konkret un Aarbechten Deel huelen, wéi d’Beien fidderen, den Hunneg schleideren…

D’Wiss ronderëm d’Beienhaus gëtt vun de Schof vum Denise Kersch « geméint ».

Ee Projet deen nohalteg a pädagogesch wäertvoll ass. Mir wënschen eis, datt dëse Projet oft kopéiert gëtt.

Rejoignez-nous!

Bei senger Ried um Virowend vum Nationalfeierdag, hat de Mierscher Buergermeeschter d’Greta Thunberg als positiivt Beispill genannt, an sech driwwer gefreet, datt déi Jonk op d’Strooss ginn an sech engagéieren fir Klimaschutz an Ëmwelt.

Dat war gutt gesot.

An awer…

D’Greta Thunberg ass eng jonk decidéiert Klimaaktivistin, déi queesch duerch d’Welt ganz vill jonk Leit dozou beweegt huet, op d’Strooss ze goen an hier Suergen an Ängschten iwwert de Klimawandel z’artikuléieren. D’Greta seet och, et wier net ze verstoen, firwat datt eis politesch Verantwortlech net agéieren.

« Cela ne devrait pas être aux enfants de faire cela. » steet zum Schluss vu sengem Pamphlet « Rejoignez-nous  #grevepourleclimat ».

Schéi Rieden halen gehéiert zur Politik. De Mierscher Buergermeeschter hat eng schéi Ried gehalen, mee hien ass kee Frënd vun alternativen Energien, vu Renaturéierung, vu Verkéiersberouegung, vun doucer Mobilitéit, vu Klimapolitik…

Schéi Wierder hëllefen net géint Klimaverännerungen. Et ass un der Zäit fir Decisiounen ze huelen an verantwortlech ze handelen.

Als kleng Stäip an als Orientéierung, hunn ech dem Mierscher Schäfferot eng Brochure vum Greta Thunberg geschenkt.

Claude Adam